லியோ, கூலி படத்தில் நான் செய்த தவறு, சுட்டிக் காட்டிய அம்மா; முதல் முறையாக மனம் திறந்த லோகேஷ் கனகராஜ்

இயக்குநர் லோகேஷ் கனகராஜ், கடைசியாக இயக்கிய கூலி திரைப்படம் கடுமையாக விமர்சனங்களை பெற்ற நிலையில், கடந்த ஓராண்டாகத் தொடர்ந்து எதிர்கொண்டு வரும் ஆன்லைன் ட்ரோலிங் குறித்து முதன்முறையாக மனம் திறந்து பேசியுள்ளார். இந்த செய்தியை ஆங்கிலத்தில் படிக்க இங்கே க்ளிக் செய்யவும்: தனது முந்தைய இரண்டு படங்களான ‘லியோ’ மற்றும் ‘கூலி’ எதிர்பார்த்த அளவுக்கு சிறப்பாக அமையவில்லை என்பதை ஒப்புக்கொண்ட அவர், அல்லு அர்ஜுனுடன் இணைந்து உருவாக்கும் தனது அடுத்த படம் இந்த விமர்சனங்களுக்கெல்லாம் முற்றுப்புள்ளி வைக்கும் என்ற நம்பிக்கையையும் தெரிவித்துள்ளார். படத்தின் புரமோஷன் நிகழ்ச்சியின்போது, டி.சி படத்தில் நடித்த சக நடிகர் ஒருவர், ட்ரோல்களை எவ்வாறு சமாளிக்கிறீர்கள் என்று லோகேஷிடம் கேட்டார். அதற்கு அவர் சிரித்துக்கொண்டே, “என் அம்மாவே ட்ரோலிங் செய்யப்படும் பதிவுகளின் ஸ்கிரீன்ஷாட்களை எனக்கு அனுப்புகிறார். இதற்கெல்லாம் எதற்கு பதற்றப்பட வேண்டும்?” என்று கூறினார். தொடர்ந்து ட்ரோலிங்கிற்கான காரணம் குறித்து பேசிய லோகேஷ், “நம்முடைய வேலை சிறப்பாக இருந்தால், மக்கள் நம்மைக் கொண்டாடுவார்கள். ஆனால், ஏதாவது தவறு நடந்தால், நாம் ட்ரோல்களுக்கு இலக்காகிவிடுவோம். என்னுடைய முந்தைய இரண்டு படங்களான ‘லியோ’ மற்றும் ‘கூலி’யில் சில தவறுகள் இருந்தன. அதனால் இப்படியான சூழல் உருவாகியுள்ளது. இப்போது அவர்கள் என்னை ட்ரோல் செய்கிறார்கள்,” என்றார். ‘லியோ’ மற்றும் ‘கூலி’ ஆகிய இரண்டு படங்களும் எதிர்பார்ப்பை பூர்த்தி செய்யவில்லை என்பதை லோகேஷ் கனகராஜ் பொதுவெளியில் அரிதாகவே ஒப்புக்கொண்டுள்ளார். இருப்பினும், இந்தப் படங்கள் இரண்டுமே வசூல் ரீதியாக வெற்றி பெற்றன. விஜய் நடித்த ‘லியோ’ திரைப்படம் உலகம் முழுவதும் ரூ.605 கோடி வசூல் செய்ததாக கூறப்படுகிறது. அதேபோல், ரஜினிகாந்த் நடித்த ‘கூலி’ திரைப்படமும் வலுவான வசூலுடன் தொடங்கியது. ஆனால், ‘கைதி’ மற்றும் ‘விக்ரம்’ படங்கள் ஏற்படுத்திய படைப்பாற்றல் எதிர்பார்ப்பை இந்த இரண்டு படங்களாலும் பூர்த்தி செய்ய முடியவில்லை. ‘லியோ’ படத்தில் வலுவில்லாத வில்லன் கதாபாத்திரங்கள், தாக்கத்தை ஏற்படுத்தாத கிளைமாக்ஸ் மற்றும் கதையை விட கேமியோ கதாபாத்திரங்களுக்கும், லோகேஷ் சினிமாட்டிக் யூனிவர்ஸை விரிவுபடுத்துவதற்கும் அதிக முக்கியத்துவம் கொடுத்த திரைக்கதை ஆகியவை கடுமையாக விமர்சிக்கப்பட்டன. ‘கூலி’ படத்திலும் சில காட்சிகளின் செயல்படுத்தல் மற்றும் ரசிகர்களுடன் சரியாக ஒன்றிணையாத சில கருத்துகள் விமர்சனத்திற்கு உள்ளாகின. வசூல் ரீதியாக நல்ல வரவேற்பு கிடைத்திருந்தாலும், படைப்பாற்றல் சார்ந்த ஏமாற்றம் காரணமாக தமிழ் சமூக வலைதளங்களில் பல மாதங்களாக லோகேஷுக்கு எதிரான விமர்சனங்களும் ட்ரோலிங்கும் தொடர்ந்து வந்தன. அவரது புகைப்படங்களை மாற்றியமைத்து வெளியிடுவது, கிண்டல் மீம்கள், வாட்ஸ்அப் ஸ்டிக்கர்கள் மற்றும் அவரை விமர்சிக்கும் பதிவுகள் என சமூக வலைதளங்களில் தினசரி ட்ரோலிங் அதிகரித்தது. இதனிடையே அல்லு அர்ஜுனுடன் லோகேஷ் கனகராஜ் இணையும் ‘AA23’ திரைப்படம் அறிவிக்கப்பட்ட பிறகு இந்த ட்ரோலிங் மேலும் தீவிரமடைந்தது. குறிப்பாக, ‘கைதி’ மற்றும் ‘விக்ரம்’ படங்களின் அடுத்த பாகங்களை உருவாக்குவதாக லோகேஷ் தொடர்ந்து கூறி வந்த நிலையில், தெலுங்கு நடிகர் அல்லு அர்ஜுனுடன் படம் இயக்கும் முடிவை சில தமிழ் சமூக வலைதளப் பயனர்கள் விமர்சித்தனர். எனினும், தனது அடுத்த படம் குறித்து லோகேஷ் கனகராஜ் மிகுந்த நம்பிக்கையுடன் பேசியுள்ளார். நான் அல்லு அர்ஜுனுடன் ‘AA23’ படத்தை இயக்கி வருகிறேன். அந்தப் படத்தின் மீது எனக்கு நம்பிக்கை இருக்கிறது. படம் வெளியானதும் ட்ரோல்கள் தானாகவே நின்றுவிடும்,” என்று அவர் தெரிவித்துள்ளார். அருண் மாதேஸ்வரன் இயக்கத்தில் உருவாகியுள்ள ‘டிசி’ திரைப்படம், பல மாதங்களாகத் தொடர்ந்து வந்த எதிர்மறையான விமர்சனங்களுக்கு மத்தியில் லோகேஷுக்கு சற்று நிம்மதியான சூழலை ஏற்படுத்தியுள்ளதாக அவரது ரசிகர்கள் கருதுகின்றனர். லோகேஷ் கனகராஜ் மற்றும் அல்லு அர்ஜுன் முதன்முறையாக இணையும் ‘AA23’ திரைப்படத்தின் படப்பிடிப்பு, அல்லு அர்ஜுன் தற்போது அட்லீ இயக்கத்தில் நடித்து வரும் படத்தை முடித்த பிறகு தொடங்கும் என்று எதிர்பார்க்கப்படுகிறது. இதற்கிடையில், கடந்த ஜூலை மாதம் நடைபெற்ற மற்றொரு நேர்காணலில் லோகேஷ் கனகராஜ், LCU (Lokesh Cinematic Universe) குறித்த கேள்விக்கும் பதிலளித்திருந்தார். ‘AA23’ படத்தை முடித்த பிறகு ‘கைதி’ மற்றும் ‘விக்ரம்’ படங்களின் அடுத்த பாகங்களுக்கு திரும்பத் திட்டமிட்டுள்ளதாக அவர் தெரிவித்தார். மேலும், தற்போது அவரது தயாரிப்பு நிறுவனத்தின் கீழ் உருவாகி வரும் ‘பென்ஸ்’ திரைப்படமும் எல்.சி.யு-வின் ஒரு பகுதிதான் என்றும் கூறினார்.