''என் சீனை ஏன் தூக்குனீங்க?" -'கருப்பு' படக் குழுவினர் மீது நடிகர் மன்சூர் அலிகான் கடும் ஆவேசம்

தமிழ் திரையுலகில் தனது தனித்துவமான வில்லன் மற்றும் குணச்சித்திர நடிப்பால் முத்திரை பதித்த நடிகர் மன்சூர் அலிகான், தற்போது 'கருப்பு' திரைப்படத்தின் குழுவினர் மீது பாய்ந்துள்ளார். திரைப்பட நிகழ்வில் தனது காட்சிகள் நீக்கப்பட்டது குறித்து மிகவும் கோபமாக மன்சூர் அலிகான் பேசுகையில், "கருப்பு' திரைப்படத்தில் இருந்து என்னுடைய காட்சிகளை எதற்காக நீக்கினீர்கள்? இப்போது படத்தைப் பார்த்த என் பிள்ளைகள் இதுகுறித்து என்னிடம் கேள்வி கேட்கிறார்கள், அவர்களுக்கு நான் என்ன பதில் சொல்வது என்று தெரியாமல் தவித்து வருகிறேன். நான் தான் உண்மையான கருப்பன். உங்களுக்கு நிஜமாகவே தைரியம் இருந்தால், நீங்கள் வெட்டி எறிந்த அந்த காட்சிகளை இப்போது பொதுமக்களின் பார்வைக்கு வெளியிடுங்கள், பார்க்கலாம். இன்றைக்குப் படத்தில் இருக்கும் பல முக்கியப் புள்ளிகள் அரைக்கால் டிராயர் போட்டுக் கொண்டு சுற்றிய காலத்திலேயே, நான் சினிமா தயாரிப்பாளராக மாறியவன். இதுவரை 350-க்கும் மேற்பட்ட திரைப்படங்களில் பல்வேறு கதாபாத்திரங்களில் நடித்துத் திரையுலகில் எனக்கென ஒரு தனி இடத்தை உருவாக்கியுள்ளேன். அப்படிப்பட்ட நீண்ட அனுபவம் கொண்ட என்னைப் போய், ஒரு காட்சியில் சும்மா டம்மியாக நிற்க வைத்து வேடிக்கை பார்த்திருக்கிறீர்களா? இன்றைக்குத் திரையில் தோன்றும் எல்லா ஹீரோக்களும் வெறும் பில்டப் மூலமாக மட்டும் தான் தங்களது வாழ்க்கையை ஓட்டிக் கொண்டிருக்கிறார்கள். நான் யாரிடமும் பிச்சை எடுக்கவில்லை, என்னுடைய உழைப்பால் உயர்ந்தவன்" என்றார்.