ராக்கெட்ரி, துரந்தர் பிரச்சார படங்களா? இந்தியராக இருப்பதை தவறாக கருத முடியுமா? விமர்சனங்களுக்கு மாதவன் பதிலடி

இயக்குநர் ஆதித்யா தர் இயக்கத்தில் ரன்வீர் சிங் நடித்த ‘துரந்தர்’ (2025) மற்றும் அதன் தொடர்ச்சியான ‘துரந்தர்: தி ரிவெஞ்ச்’ (2026) ஆகிய திரைப்படங்கள் மிகப்பெரிய வெற்றியைப் பெற்றன. இரு படங்களுமே தனித்தனியாக ரூ.1,000 கோடி வசூல் கிளப்பில் இணைந்தன. இருப்பினும், இந்தப் படங்களுக்கு கலவையான விமர்சனங்களே கிடைத்தன. இந்த செய்தியை ஆங்கிலத்தில் படிக்க இங்கே க்ளிக் செய்யவும்: சிலர் இந்த ஸ்பை-ஆக்‌ஷன் திரைப்படங்களை தலைசிறந்த படைப்புகள் எனப் பாராட்டிய நிலையில், மற்றொரு தரப்பினர் இவை பிரச்சாரப் படங்களாக இருப்பதாகவும், அரசின் தவறுகளை மறைக்க முயற்சிப்பதாகவும் விமர்சித்தனர். இந்நிலையில், இந்தப் படங்களில் முக்கிய கதாபாத்திரத்தில் நடித்த நடிகர் மாதவன், இப்படங்களுக்கு எதிராக முன்வைக்கப்படும் விமர்சனங்களுக்கு பதிலளித்துள்ளார். இது குறித்து பேசிய அவர், ஒவ்வொருவரும் அவரவர் வளர்ந்த சூழல் மற்றும் கற்றுக்கொண்ட விஷயங்களின் தாக்கத்தால் உருவாகிறார்கள். சிறு வயதிலிருந்தே, நமது நாடுதான் நமக்கு மிகவும் முக்கியமானது என்றும், நாட்டுக்காக நாம் செய்யும் செயல்களும் முக்கியமானவை என்றும் எனக்குக் கற்றுக் கொடுக்கப்பட்டது. எனது சமூக வலைதளப் பதிவுகள் அல்லது நேர்காணல்களைப் பார்த்தால், எந்த அரசியல் கட்சியையோ, அரசியல்வாதியையோ அல்லது அரசியல் தலைவரையோ நான் ஒருபோதும் தவறாகப் பேசியதில்லை என்பதைப் பார்க்கலாம். யாராவது நல்ல விஷயம் செய்தால், உதாரணமாக முன்னாள் தமிழக முதல்வர் மு.க. ஸ்டாலின் அவர்கள் ஏதாவது நல்லது செய்திருந்தால், உடனடியாக அவரைப் பாராட்டுவேன் என்று கலாட்டா பிளஸ்ஸுக்கு அளித்த பேட்டியில் மாதவன் தெரிவித்துள்ளார். ‘நான் நல்ல விஷயங்களை மட்டுமே செய்வேன்’ – அரசியல் குறித்து மாதவன் தொடர்ந்து பேசிய மாதவன், நான் நல்ல விஷயங்களை மட்டுமே செய்ய வேண்டும் என்று முடிவு செய்துள்ளேன். ஏதாவது ஒரு விஷயம் குறித்து எனக்கு சந்தேகம் இருந்தால், அதைப் பற்றி நான் பேச மாட்டேன். மக்களால் தேர்ந்தெடுக்கப்பட்ட ஒருவர் பிரதமராகவோ அல்லது முதலமைச்சராகவோ பதவியேற்கும்போது, அவர்களுக்கு ஆதரவளிப்பது எனது கடமை என்று நான் நம்புகிறேன். இன்றுவரை தமிழகத்திலோ அல்லது தேசிய அளவிலோ எந்த அரசியல் கட்சியும் என்னை அணுகி, தங்களுக்கு ஆதரவாகப் பிரச்சாரம் செய்யும்படியோ அல்லது கட்சியில் இணையும்படியோ கேட்டதில்லை என்றார். சமூக வலைதளங்களில் சிலர் தெரிவிக்கும் கருத்துகள் எனது முடிவுகளை எந்த விதத்திலும் பாதிப்பதில்லை. அவற்றை அவர் வெறும் விரக்தியின் வெளிப்பாடாகவே பார்க்கிறேன். நமது நாட்டில் ஏதாவது நல்ல விஷயம் நடந்தால் உதாரணமாக, ஒரு விளையாட்டு வீரர் சிறப்பாக செயல்பட்டு நாட்டுக்குப் பெருமை சேர்த்தால், அதைப் பற்றி நான் சமூக வலைதளங்களில் பதிவிடுவது சரியான விஷயம் என்று நான் நினைப்பதால்தான். அதற்காக யாராவது என்னைத் தவறாகப் பேசினால், அவர்களின் நோக்கம் என்ன என்பதை நான் கேள்வி கேட்பேன் என்று மாதவன் குறிப்பிட்டார். ‘துரந்தர்’, ‘ராக்கெட்ரி’ படங்கள் மீதான ‘பிரச்சாரப் படம்’ விமர்சனங்களுக்கு பதில் ‘துரந்தர்’ திரைப்படம் சிலரால் ‘பிரச்சாரப் படம்’ என விமர்சிக்கப்பட்டதை நேர்காணல் செய்தவர் சுட்டிக்காட்டினார். அதேபோல், மாதவன் இயக்குநராக அறிமுகமான ‘ராக்கெட்ரி: தி நம்பி எஃபெக்ட்’ (2022) திரைப்படமும் இதுபோன்ற விமர்சனங்களை எதிர்கொண்டது. அந்தப் படத்தில் இந்தியராக இருப்பது மற்றும் நாட்டின் பாரம்பரியங்களுக்கு அதிக முக்கியத்துவம் கொடுக்கப்பட்டுள்ளதாக சிலர் விமர்சித்தனர். இதற்கு பதிலளித்த மாதவன், “இந்தியராக இருப்பதை எப்படி தவறான விஷயமாகப் பார்க்க முடியும் என்பது எனக்குப் புரியவில்லை. ‘அளவுக்கு அதிகமாக இந்தியராக இருப்பது’ என்றால் என்ன? எனக்குத் தெரியவில்லை. நான் மிகவும் இந்தியராக இருப்பதைப் படத்தில் காட்டுவது தவறா? எனக்குத் தெரியவில்லை. அது எனக்கு வெளியில் இருந்து கொடுக்கப்பட்ட ஒரு சிந்தனை அல்ல; நான் பார்த்ததை, உணர்ந்ததை அப்படியே காட்டினேன். இது அரசியல் கருத்துகூட அல்ல. ‘துரந்தர்’ திரைப்படத்தின் கதை பாகிஸ்தானை மையமாகக் கொண்டது. இந்தியாவில் நடப்பதைப் போலவே அங்கும் நல்ல விஷயங்களும், மோசமான விஷயங்களும் நடக்கின்றன. அப்படியிருக்கும்போது, அந்தப் படத்தில் எங்கே ‘பிரச்சாரம்’ இருக்கிறது என்பது எனக்குப் புரியவில்லை என்று கூறினார். நம்பி நாராயணனின் வாழ்க்கையை உண்மையாகவே காட்டினேன் நம்பி நாராயணனின் வாழ்க்கையை மையமாக வைத்து ‘ராக்கெட்ரி’ திரைப்படத்தை உருவாக்கியதாகக் கூறிய மாதவன், நம்பி சார் விஷயத்தில், அவரது வாழ்க்கையில் என்ன நடந்ததோ அதைத்தான் நான் காட்டினேன். அவர் உண்மையில் யார் என்பதை வெளிப்படுத்துவதற்கே நான் பயந்தால், அந்தக் கதையை எப்படி நேர்மையாகச் சொல்ல முடியும்? அவர் கோயிலுக்குச் செல்லும் ஒரு மனிதர். அதே நேரத்தில் கண்டுபிடிப்பாளரும் பொறியாளருமான ஜி.டி.நாயுடு ஒரு நாத்திகர். அப்படியென்றால், திரைப்படத்தில் அவர் கோயிலுக்குச் செல்வதைப் போன்ற விஷயங்களைக் காட்டக்கூடாது என்று சொல்ல முடியுமா? நான் அந்தக் கதாபாத்திரத்திற்கு உண்மையாக இருக்க வேண்டும். அதற்காக நான் கடவுளை நம்பவில்லை என்றோ அல்லது அதற்கு நேர்மாறாகவோ யாரும் கூற முடியாது. நான் ஒரு நடிகர். என்னுடைய பணி, விஷயங்கள் எப்படி நடந்தனவோ அதை அப்படியே வெளிப்படுத்துவதுதான். இந்தியாவைப் பற்றிய அனைத்து நல்ல விஷயங்களையும் மேலும் சிறப்பாக வெளிப்படுத்த வேண்டும் என்பதுதான் என்னுடைய தனிப்பட்ட கருத்து. அதைக் குற்றம் என்று சொல்ல முடியாது என்றார். ஆன்லைனில் போலி கணக்குகள் மற்றும் ‘பெய்டு ட்ரோல்களை’ கண்டுபிடிப்பது எப்படி? தொடர்புடைய விமர்சனங்கள் மற்றும் பொருத்தமற்ற விமர்சனங்களை எவ்வாறு வேறுபடுத்திப் பார்க்கிறார் என்று மாதவனிடம் கேட்கப்பட்டது. அதற்கு அவர், அது மிகவும் எளிதானது. முதலில் அந்த நபர் பதிவிட்டுள்ள கருத்தைப் பாருங்கள். பின்னர் அவர் அந்தக் கணக்கை எப்போது உருவாக்கினார், அவருக்கு எத்தனை பின்தொடர்பவர்கள் உள்ளனர் என்பதைப் பாருங்கள். இந்த விஷயங்களைப் பார்த்தாலே, அது ஒரு ‘பாட்’ கணக்கா அல்லது பணம் கொடுத்து இயக்கப்படும் கணக்கா என்பதை எளிதாகக் கண்டுபிடித்துவிடலாம் என்றார். மாதவன் தற்போது இயக்குநர் கிருஷ்ணகுமார் ராமகுமாரின் ‘ஜி.டி.என்.’ திரைப்படத்தில் நடித்துள்ளார். கண்டுபிடிப்பாளரும் பொறியாளருமான ஜி.டி. நாயுடுவின் வாழ்க்கையை மையமாகக் கொண்ட இந்தப் படத்தில் மாதவன் கதாநாயகனாக நடித்துள்ளார். மேலும், இப்படத்தில் சத்யராஜ், ஜெயராம், பிரியாமணி மற்றும் துஷாரா விஜயன் ஆகியோர் முக்கிய கதாபாத்திரங்களில் நடித்துள்ளனர்.