வெள்ளத்தில் சிக்கிய நேபாள நீர்மின் நிலையங்கள்: இந்தியாவுக்கு வரும் மின்சாரம் பாதியாகக் குறைந்தது

எழுதியவர்: பிரதீஷ் தீப் நேபாளத்தில் புதன்கிழமை ஏற்பட்ட திடீர் வெள்ளப்பெருக்கில் அங்குள்ள பல மின் உற்பத்தி நிலையங்கள் பாதிக்கப்பட்டன. இதில் இந்தியாவுக்கு மின்சாரம் வழங்கி வந்த ஒரு நீர்மின் நிலையமும் அடங்கும். நேபாளத்தின் பெரும்பான்மையான மின் தேவையைப் பூர்த்தி செய்யும் பல மின் உற்பத்தி நிலையங்களுக்கு ஏற்பட்டுள்ள சேதத்தின் அளவை அதிகாரிகள் தற்போது மதிப்பிட்டு வருகின்றனர். இந்திய மூத்த அரசு அதிகாரி ஒருவர் 'தி இந்தியன் எக்ஸ்பிரஸ்' நாளிதழிடம் வியாழக்கிழமை தெரிவிக்கையில், நேபாளம் இந்தியாவுக்கான தனது மின் விநியோகத்தை சுமார் 800 மெகாவாட்டில் (MW) இருந்து குறைந்தது 400 மெகாவாட்டாக, அதாவது பதியாகக் குறைத்துள்ளதாகக் கூறினார். வெள்ளத்தால் பாதிக்கப்பட்ட நிலையங்களில் இந்தியாவுக்கு மின்சாரம் வழங்கும் 14 மெகாவாட் திறன் கொண்ட தேவிஹாட்ட நீர்மின் நிலையமும் ஒன்று என்று அந்த அதிகாரி தெரிவித்தார். நேபாளத்தில் உள்ள பல நீர்மின் நிலையங்களில் இருந்து இந்தியா மின்சாரத்தை இறக்குமதி செய்து வருகிறது. 'கிரிட் இந்தியா' அமைப்பின் தரவுகளின்படி, திடீர் வெள்ளம் தாக்கிய ஆகஸ்ட் 26 அன்று, அந்நாளின் உச்சகட்ட அளவாக நேபாளத்தில் இருந்து இந்தியா 963.4 மெகாவாட் மின்சாரத்தை இறக்குமதி செய்துள்ளது. இந்த செய்தியை ஆங்கிலத்தில் படிக்க இங்கே க்ளிக் செய்யவும். பங்களாதேஷுக்கு மின்சாரம் வழங்கும் சிலிமே மற்றும் திரிசூலி ஆகிய மேலும் இரு நீர்மின் நிலையங்களும் பாதிக்கப்பட்டுள்ளன. வெள்ளம் காரணமாக சுமார் 13 நீர்மின் நிலையங்களும் ஒரு சூரிய மின் உற்பத்தி நிலையமும் பாதிக்கப்பட்டுள்ளதாக நேபாளத்தின் எரிசக்தி அமைச்சகம் வெளியிட்டுள்ள அறிக்கையில் தெரிவிக்கப்பட்டுள்ளது. நேபாளத்திற்கும் திபெத்திற்கும் இடையிலான இமயமலைப் பகுதியில் பனிப்பாறை சரிந்ததால் ஏற்பட்ட இந்த வெள்ளப்பெருக்கு, முக்கியமாக நீர் மின்சாரம் உட்பட சுமார் 359 மெகாவாட் திறன் கொண்ட மின் உற்பத்தியைப் பாதித்துள்ளதாக எரிசக்தி அமைச்சகத்தின் அறிக்கை குறிப்பிடுகிறது. இது குறித்து இந்தியாவின் மின்துறை அமைச்சகம் மற்றும் 'கிரிட் இந்தியா' ஆகியவற்றுக்கு அனுப்பப்பட்ட கேள்விகளுக்குப் பதில் எதுவும் வரவில்லை. நேபாள அரசின் கூற்றுப்படி, ரசுவா மாவட்டத்தில் 236 மெகாவாட் மொத்த திறன் கொண்ட இயங்கி வந்த மின் நிலையங்களும், 342.42 மெகாவாட் மொத்த திறன் கொண்ட கட்டுமானத்தில் உள்ள மூன்று முக்கிய நீர்மின் திட்டங்களும் பாதிக்கப்பட்டுள்ளன. பாதிக்கப்பட்ட திட்டங்களில் மேல் திரிசூலி-1 (216 மெகாவாட்), ரசுவாகதி (111 மெகாவாட்), ரசுவா போடேகோஷி (120 மெகாவாட்), சஞ்சென் கோலா (78 மெகாவாட்), மேல் மைலுங் ஏ (6.42 மெகாவாட்), மைலுங் கோலா (5 மெகாவாட்), லைடாங் கோலா (20 மெகாவாட்) மற்றும் சிலிமே (22 மெகாவாட்) ஆகியவை அடங்கும். நுவாகோட் மாவட்டத்தில், 123 மெகாவாட் மொத்த திறன் கொண்ட நான்கு இயங்கும் மின் நிலையங்களும், 52.6 மெகாவாட் மொத்த திறன் கொண்ட இரண்டு கட்டுமானத்தில் உள்ள மின் திட்டங்களும் பாதிக்கப்பட்டுள்ளன. இந்தத் திட்டங்களில் திரிசூலி நீர்மின் திட்டம் (24 மெகாவாட்), தேவிஹாட்ட நீர்மின் திட்டம் (14.1 மெகாவாட்), மேல் திரிசூலி-3ஏ (60 மெகாவாட்), மேல் திரிசூலி-3பி (37 மெகாவாட்), மத்திய திரிசூலி கங்கா (15.6 மெகாவாட்) மற்றும் 25 மெகாவாட் திறன் கொண்ட சூரிய மின்சக்தி திட்டம் ஆகியவை அடங்கும். நேபாளத்தின் மொத்த நிறுவப்பட்ட மின் உற்பத்தியான சுமார் 4,300 மெகாவாட்டில் நீர்மின்சாரமே பெரும்பான்மையான பங்கைக் கொண்டுள்ளது. நேபாளத்திற்கும் இந்தியாவுக்கும் இடையிலான மின்சார வர்த்தகம் பருவகால அடிப்படையிலானது. பருவமழை காலத்தில் நேபாளம் தனது உபரி மின்சாரத்தை இந்தியாவுக்கு ஏற்றுமதி செய்கிறது; அதே வேளையில், உள்நாட்டு நீர்மின் உற்பத்தி குறையும் வறண்ட குளிர்காலத்தில் நேபாளம் இந்தியாவில் இருந்து மின்சாரத்தை இறக்குமதி செய்கிறது.