சென்னையில் ரூ.1,200 கோடியில் புதிய தலைமைச் செயலகம்: முதலமைச்சர் விஜய் அதிரடி அறிவிப்பு

சென்னையில் 20 லட்சம் சதுர அடி பரப்பளவில், ரூ.1,200 கோடி மதிப்பீட்டில் நவீன வசதிகளுடன் கூடிய புதிய தலைமைச் செயலகம் அமைக்கப்படும் என்று முதலமைச்சர் ஜோசப் விஜய் சட்டப்பேரவையில் அறிவித்துள்ளார். சட்டமன்றத்தில் விதி எண் 110-ன் கீழ் இந்த அறிவிப்பை அவர் வெளியிட்டுள்ளார். அனைத்து அரசுத் துறைகளும் ஒருங்கிணைந்து செயல்படும் வகையில் இந்த புதிய தலைமைச் செயலகம் மற்றும் சட்டமன்ற வளாகம் உருவாக்கப்பட உள்ளது.

தற்போது புனித ஜார்ஜ் கோட்டையில் இயங்கி வரும் தலைமைச் செயலகத்தை விரிவாக்கம் செய்ய வாய்ப்பில்லாத காரணத்தினால் இந்த புதிய கட்டட வளாகத்தை உருவாக்கும் முடிவு எடுக்கப்பட்டுள்ளதாக முதலமைச்சர் விளக்கமளித்துள்ளார். இந்தத் திட்டத்திற்கான பணிகள் விரைவில் தொடங்கப்படவுள்ளன. இதற்கான டெண்டர் நடைமுறைகள் தொடர்பான சர்ச்சைகளுக்கு மத்தியில் இந்த முக்கிய அறிவிப்பு வெளியாகியுள்ளது என்பது குறிப்பிடத்தக்கது.

புதிய தலைமைச் செயலகம் கட்டி முடிக்கப்பட்டாலும், தற்போதைய தலைமைச் செயலகமான புனித ஜார்ஜ் கோட்டை ஒரு வரலாற்றுச் சின்னமாகத் தொடர்ந்து பாதுகாக்கப்படும் என்று முதலமைச்சர் விஜய் உறுதி அளித்துள்ளார். உலகத்தரம் வாய்ந்த நவீன வசதிகளுடன் கூடிய இந்த ஒருங்கிணைந்த புதிய கட்டட வளாகத்தை அமைப்பதன் அவசியம் குறித்து அவர் விரிவாகப் பேசியுள்ளார்.