எண்ணூர் முதல் மாமல்லபுரம் வரை படகுப் போக்குவரத்து; சென்னை மெட்ரோ ரயிலின் புதிய திட்டம்

சென்னை நகரின் போக்குவரத்து நெரிசலைக் குறைத்து, உள்கட்டமைப்பை உலகத் தரத்திற்கு உயர்த்தும் நோக்கில் தமிழ்நாடு அரசு பல புதிய முயற்சிகளை மேற்கொண்டு வருகிறது. இதன் ஒரு பகுதியாக, வரலாற்றுச் சிறப்புமிக்க பக்கிங்காம் கால்வாயைப் பயன்படுத்தி 'வாட்டர் மெட்ரோ' (நீர் வழி மெட்ரோ) திட்டத்தைச் செயல்படுத்த அரசு திட்டமிட்டுள்ளது. 2026 - 27 ஆம் நிதியாண்டுக்கான பட்ஜெட்டில் கூவம் மற்றும் அடையாறு ஆறுகளைத் தூய்மைப்படுத்துவதுடன், பக்கிங்காம் கால்வாயிலும் நவீன படகுப் போக்குவரத்தைத் தொடங்குவதற்கான சாத்தியக்கூறு அறிக்கையைத் தயாரிக்க சென்னை மெட்ரோ ரயில் நிறுவனம் தற்போது டெண்டர் கோரியுள்ளது. முதற்கட்டமாக, எண்ணூர் முதல் மாமல்லபுரம் வரையிலான 53 கிலோமீட்டர் தூரத்திற்குப் படகுப் போக்குவரத்துச் சேவையை அமைப்பது குறித்து தீவிரமாகப் பரிசீலிக்கப்பட்டு வருகிறது. சோழமண்டலக் கடற்கரைக்கு இணையாக, ஆந்திரா மற்றும் தமிழ்நாட்டை இணைக்கும் வகையில் மொத்தம் 796 கி.மீ நீளம் கொண்ட பக்கிங்காம் கால்வாயில், சுமார் 160 கி.மீ தூரம் தமிழகப் பகுதியில் அமைந்துள்ளது. 19 மற்றும் 20-ஆம் நூற்றாண்டுகளில் முதன்மை நீர்வழியாக இருந்த இக்கால்வாய், காலப்போக்கில் கழிவுநீர் வெளியேற்றம் மற்றும் ஆக்கிரமிப்புகளால் பெருமளவில் பாதிக்கப்பட்டது. இந்நிலையில், சுமார் அரை நூற்றாண்டுக்குப் பிறகு சென்னை பெருநகர போக்குவரத்து ஆணையத்தின் முயற்சியால் இதில் மீண்டும் படகுப் போக்குவரத்து உயிர் பெறவுள்ளது. இந்தியாவின் முதல் வாட்டர் மெட்ரோ திட்டமானது 2023-ஆம் ஆண்டு கேரள மாநிலம் கொச்சியில் சுமார் ரூ. 1,000 கோடி மதிப்பீட்டில் தொடங்கப்பட்டு வெற்றிகரமாகச் செயல்பட்டு வருகிறது. அங்குக் குளிர்சாதன வசதி, தானியங்கி பயணச்சீட்டு முறை போன்ற நவீன வசதிகளுடன் வெறும் ரூ. 20 கட்டணத்தில் இச்சேவை வழங்கப்படுகிறது. அதே போன்ற மெட்ரோ ரயில் தரம் வாய்ந்த வசதிகளுடன் சென்னையிலும் இத்திட்டம் செயல்படுத்தப்படவுள்ளதால், மக்களின் எதிர்பார்ப்பு கணிசமாக அதிகரித்துள்ளது. இத்திட்டம் முழுமையாக நடைமுறைக்கு வரக் குறைந்தபட்சம் 5 ஆண்டுகள் ஆகும் எனக் கணிக்கப்பட்டுள்ளது.