செங்கல்பட்டு விவசாயிகள் கோரிக்கை நிறைவேறியது! ரூ.102 கோடியில் தொடங்கப்பட்ட பிரம்மாண்ட திட்டம்! முழு விவரம்

<p style="text-align: justify;">செங்கல்பட்டு மாவட்டத்தில் உள்ள ஏரி மற்றும் குளங்களில் நீர்வரத்தை அதிகரிக்கும் நோக்கில், பல்வேறு பணிகளை மேற்கொள்ள ரூ.102.20 கோடி நிதி ஒதுக்கீடு செய்யப்பட்டு, பணிகள் தீவிரமாகத் தொடங்கி நடந்து வருகின்றன.</p> <h3 style="text-align: justify;">நீர்நிலைகளின் தற்போதைய நிலை</h3> <p style="text-align: justify;">செங்கல்பட்டு மாவட்டத்தில் மொத்தம் 359 ஊராட்சிகள் உள்ளன. ஊரக வளர்ச்சித் துறையின் கட்டுப்பாட்டின் கீழ் 584 ஏரிகளும், 2,512 குளங்களும் பராமரிக்கப்பட்டு வருகின்றன. இந்த ஏரித் தண்ணீரை அடிப்படையாகக் கொண்டே அப்பகுதிகளில் பெருமளவில் நெற்பயிர் சாகுபடி செய்யப்படுகிறது. இருப்பினும், கடந்த பல ஆண்டுகளாக நீர்வரத்து கால்வாய்கள் சரிவர தூர்வாரப்பட்டு பராமரிக்கப்படாததால், பருவமழைக் காலங்களில் நீர்நிலைகளில் முழு கொள்ளளவு தண்ணீர் நிரம்ப முடியாத சூழல் நிலவி வந்தது.</p> <h3 style="text-align: justify;">விவசாயிகளின் கோரிக்கையும் கலெக்டரின் நடவடிக்கையும்</h3> <p style="text-align: justify;">சமீபத்தில் நடைபெற்ற விவசாயிகள் நலன் காக்கும் நாள் கூட்டத்தில், செங்கல்பட்டு மாவட்ட ஆட்சியர் வீராப்பனிடம் விவசாயிகள் நீர்வரத்து கால்வாய்களைத் தூர்வாரி சீரமைக்க வேண்டும் என்று மனு அளித்திருந்தனர். அதனைத் தொடர்ந்து, மத்திய அரசின் வி.பி.ஜி., ராம் - ஜி திட்டம் (வளர்ச்சி அடைந்த பாரதம் – கிராம வேலைத் திட்டம்) மூலம் 947 நீர்வரத்துக் கால்வாய் பணிகளை மேற்கொள்ளவும், அதற்கு 29 லட்சம் மனித சக்தி நாட்களைப் பயன்படுத்தவும் நிர்வாக அனுமதி வழங்கி, ஆட்சியர் வீராப்பன் கடந்த 11-ம் தேதி உத்தரவிட்டார்.</p> <h3 style="text-align: justify;">செயலாக்க விதிமுறைகள்</h3> <p style="text-align: justify;"><span style="color: #ba372a;"><strong>இதுகுறித்து மாவட்ட ஆட்சியர் வெளியிட்ட அறிக்கையில்,</strong></span> இப்பணிகளுக்கான நில உரிமை எஃப்.எம்.பி., நிலத்தின் வகைப்பாடு ஆவணங்களை வருவாய்த் துறையிடமிருந்து வட்டார வளர்ச்சி அலுவலர் பெற வேண்டும் என்று குறிப்பிடப்பட்டுள்ளது. மேலும், கிராம சபை கூட்டங்களில் இதற்கான தீர்மானம் நிறைவேற்றப்பட்டு, ஊராட்சி செயலருக்கு பணி ஆணை வழங்கப்பட வேண்டும். இத்திட்டத்தில் எந்திரங்களைப் பயன்படுத்தத் தடை விதிக்கப்பட்டுள்ளதால், முழுமையாக மனித சக்தியை மட்டுமே பயன்படுத்தி பணிகளை மேற்கொள்ள வேண்டும் என்றும் அறிவுறுத்தப்பட்டுள்ளது.</p> <h3 style="text-align: justify;">3 மாதங்களுக்குள் முடிக்க உத்தரவு</h3> <p style="text-align: justify;">இதுகுறித்து ஊரக வளர்ச்சித்துறை அதிகாரி ஒருவர் கூறுகையில், "மாவட்டத்தில் உள்ள 7 ஊராட்சி ஒன்றியங்களில் ஏரி மற்றும் குளங்களுக்கு நீர் செல்லும் வரத்துக் கால்வாய்களைத் தூர்வாரும் பணிகள் தற்போது தொடங்கி நடைபெற்று வருகின்றன. இந்தப் பணிகளை இன்னும் 3 மாதங்களுக்குள் விரைந்து முடிக்குமாறு வட்டார வளர்ச்சி அலுவலர்களுக்கு கண்டிப்பான உத்தரவு பிறப்பிக்கப்பட்டுள்ளது" என்று தெரிவித்தார்.</p>