இனி யுபிஐ மூலம் ரூ.5 லட்சம் வரை ஈஸியா அனுப்பலாம்: யாருக்கெல்லாம் பொருந்தும்? யு.பி.ஐ புதிய விதிகள் என்னென்ன?

பொதுவாக ஒரு யுபிஐ (UPI) பரிவர்த்தனைக்கான அதிகபட்ச வரம்பு ரூ.1 லட்சம் என்றே பலரும் கருதுகின்றனர். ஆனால், யு.பி.ஐ மூலம் செய்யப்படும் அனைத்துப் பரிவர்த்தனைகளுக்கும் இந்த ரூ.1 லட்சம் வரம்பு பொருந்தாது. இந்திய தேசிய கொடுப்பனவு கழகம் (NPCI) மற்றும் இந்திய ரிசர்வ் வங்கி (RBI) ஆகியவை வரி செலுத்துதல், புதிய பங்கு வெளியீடு (IPO), மருத்துவமனைகள் மற்றும் கல்வி நிறுவனங்களுக்கான கட்டணங்கள் போன்ற குறிப்பிட்ட சில தேவைகளுக்கு கூடுதல் பணப் பரிவர்த்தனை வரம்புகளை அனுமதித்துள்ளன. மேலும், 'யு.பி.ஐ லைட்' மற்றும் 'யு.பி.ஐ 123பே' போன்ற சேவைகளுக்கு தனித்தனியான வரம்புகள் நிர்ணயிக்கப்பட்டுள்ளன. எனவே, அதிக தொகை செலுத்துவதற்கு முன், நீங்க செய்யும் பரிவர்த்தனை எந்த வரம்பிற்குள் வருகிறது என்பதை அறிந்துகொள்வது அவசியம். வழக்கமான யுபிஐ பரிவர்த்தனைகள்: ரூ.1 லட்சம் வழக்கமான யுபிஐ பரிவர்த்தனைகளுக்கு என்.பி.சி.ஐ நிர்ணயித்துள்ள பொதுவான வரம்பு ரூ.1 லட்சம் ஆகும். எனினும், மூலதனச் சந்தைப் பரிவர்த்தனைகள், ஐபிஓ விண்ணப்பங்கள், கடன் வசூல், காப்பீடு, மருத்துவம் மற்றும் கல்வி போன்ற குறிப்பிட்ட பயன்பாடுகளுக்கு இந்த வரம்பை ஒழுங்குமுறை அமைப்புகள் படிப்படியாக உயர்த்தியுள்ளன. இதன் மூலம், யுபிஐ வாயிலாக அனுப்பக்கூடிய பணத்தின் அளவு, எந்த நோக்கத்திற்காகச் செலுத்துகிறீர்கள் என்பதைப் பொறுத்தே அமைகிறது. வரி செலுத்துதல்களுக்கு ரூ.5 லட்சம் வரை அனுமதி யுபிஐ வரம்பு உயர்த்தப்பட்டுள்ள முக்கியப் பிரிவுகளில் வரி செலுத்துதலும் ஒன்றாகும். வரி செலுத்துவதற்கான யுபிஐ வரம்பை ரிசர்வ் வங்கி ரூ.1 லட்சத்திலிருந்து ரூ.5 லட்சமாக உயர்த்தியுள்ளது. இதன் மூலம் ரூ.3 லட்சம் போன்ற பெரிய தொகையிலான வரிகளைக்கூட எந்தத் தடையுமின்றி யுபிஐ மூலம் எளிதாக செலுத்த முடியும். மருத்துவமனைகள், கல்வி நிறுவனங்களுக்குச் செலுத்தப்படும் கட்டணங்களுக்கும் ஒரு பரிவர்த்தனைக்கு அதிகபட்சமாக ரூ.5 லட்சம் வரை அனுமதிக்கப்படுகிறது. ஐ.பி.ஓ (IPO) விண்ணப்பங்கள் மற்றும் 'RBI Retail Direct Scheme' திட்டத்தின் கீழான முதலீடுகளுக்கும் ரூ.5 லட்சம் வரம்பு பொருந்தும். குறிப்பிட்ட மூலதனச் சந்தைப் பரிவர்த்தனைகள் மற்றும் காப்பீட்டுக் கட்டணங்களைச் செலுத்துவதற்கான வரம்பு ரூ.2 லட்சம் ஆகும். UPI Lite மற்றும் UPI 123Pay சேவைகளுக்கான வரம்புகள் அனைத்து யுபிஐ தயாரிப்புகளும் ஒரே விதியைப் பின்பற்றுவதில்லை: சிறிய அளவிலான அன்றாடப் பரிவர்த்தனைகளுக்காக உருவாக்கப்பட்ட இந்தச் சேவையில், ஒரு முறைக்கு அதிகபட்சமாக ரூ.1,000 வரை மட்டுமே செலுத்த முடியும். இதன் வாலட்டில் அதிகபட்சமாக ரூ.5,000 வரை இருப்பு வைத்திருக்கலாம். சாதாரண 'பீச்சர்' போன்களில் இணைய வசதி இல்லாமல் யுபிஐ பரிவர்த்தனை செய்ய அறிமுகப்படுத்தப்பட்ட இச்சேவையில், ஒரு பரிவர்த்தனைக்கு அதிகபட்சமாக ரூ.10,000 வரை அனுப்ப முடியும். வங்கிகள் விதிக்கும் தனிப்பட்ட வரம்புகள் ஒரு பரிவர்த்தனை NPCI அனுமதித்த அதிகபட்ச வரம்பிற்குள் இருந்தாலும், வாடிக்கையாளரால் முழுத் தொகையையும் அனுப்ப முடியாமல் போக வாய்ப்புள்ளது. யுபிஐ கட்டமைப்பில் உள்ள வங்கிகள், பாதுகாப்பு மற்றும் ஒழுங்குமுறை விதிகளுக்கு உட்பட்டு தங்களுக்கென தனிப்பட்ட உள் வரம்புகளை (Internal Limits) நிர்ணயிக்க உரிமை கொண்டுள்ளன. எனவே, நிர்ணயிக்கப்பட்ட யுபிஐ வரம்பிற்குள் பரிவர்த்தனை செய்தும் அது நிராகரிக்கப்பட்டால், உங்கள் வங்கி அல்லது நீங்கள் பயன்படுத்தும் யுபிஐ செயலி விதித்துள்ள வரம்புகளைச் சரிபார்க்க வேண்டும். யுபிஐ பரிவர்த்தனைகளுக்கான உச்சவரம்பு என்பது அனைத்திற்கும் பொதுவாக ரூ.1 லட்சம் மட்டுமே அல்ல; பணம் செலுத்தும் பிரிவு, பயன்படுத்தும் யுபிஐ சேவை மற்றும் உங்கள் வங்கி நிர்ணயித்துள்ள வரம்புகளைப் பொறுத்தே அதிகபட்சத் தொகை தீர்மானிக்கப்படுகிறது.