மிதக்கும் சூரியமின் திட்டம்: இந்தியாவின் அடுத்த மாபெரும் ஆற்றல் புரட்சியா?

Written by Shantanu Roy இந்தியாவின் சூரியமின் உற்பத்தி திறன் 2016-இல் 3 ஜிகாவாட்டாக (GW) இருந்தது, 2026-இல் 160 ஜிகாவாட்டிற்கும் அதிகமாக மிக வேகமாகக் வளர்ச்சியடைந்துள்ளது. இது முக்கியமாக பெரிய அளவிலான திட்டங்கள் மூலமாகவே சாத்தியமானது. ஆனால், நகராக்கம் மற்றும் விவசாயத்துடன் சூரியமின் திட்டங்கள் போட்டியிடுவதாலும், சுற்றுச்சூழல் பாதுகாப்பு முதன்மையான தேவையாக இருப்பதாலும், புதிய திட்டங்களுக்கு நிலத்தைக் கண்டுபிடிப்பது கடினமாகி வருகிறது. எனவே, கூடுதல் நிலம் தேவைப்படாமல் சூரியமின் திறனை விரிவாக்குவதற்கான வழிகளை கொள்கை வகுப்பாளர்கள் ஆராய வேண்டியுள்ளது. சமீபத்தில் ஒப்புதல் அளிக்கப்பட்ட பிரதான் மந்திரி சூர்ய சரோவர் யோஜனா (PM-SSY) திட்டம், நிலத்தைப் பயன்படுத்தாத சூரியமின் பயன்பாடுகளை ஊக்குவிக்கும் இந்திய அரசின் எண்ணத்தை தெளிவாக உணர்த்துகிறது. இத்திட்டம் 5,000 மெகாவாட் (MW) மிதக்கும் சூரியமின் திட்டங்களை ரூ.5,070 கோடி மொத்த நிதியீட்டில் உருவாக்குவதை நோக்கமாகக் கொண்டுள்ளது. மிதக்கும் சூரியமின் பயன்பாட்டை விரிவுபடுத்துவதற்கான முதல் பிரத்யேக தேசிய முயற்சியாக இது திகழ்கிறது. மின்சாரக் கட்டமைப்பின் (Grid) ஸ்திரத்தன்மையை ஆதரவளிக்கும் வகையில், குறைந்தபட்சம் 2 மணிநேர சேமிப்புத் திறன் கொண்ட, அதாவது 10,000 MWh (மெகாவாட்-மணிநேரம்; 1 MWh என்பது 1 மெகாவாட் மின்சாரம் தொடர்ச்சியாக ஒரு மணிநேரம் பயன்படுத்தப்படுவது அல்லது உற்பத்தியாவதாகும்) ஒட்டுமொத்த சேமிப்புத் திறன் கொண்ட இணைக்கப்பட்ட ஆற்றல் சேமிப்பு அமைப்புகளையும் (Energy Storage Systems) இத்திட்டம் உள்ளடக்கியுள்ளது. பெரிய அளவிலான மிதக்கும் சூரியமின் உற்பத்தி நிலையங்களில் இந்தியா ஏற்கனவே சில முன்னேற்றங்களை அடைந்திருந்தாலும், இத்திட்டம் நாடு தழுவிய அளவில் இதன் செயல்பாட்டை விரைவுபடுத்துவதற்குத் தேவையான கொள்கை ஊக்கத்தை வழங்க முடியும். இந்த செய்தியை ஆங்கிலத்தில் படிக்க இங்கே க்ளிக் செய்யவும். மிதக்கும் சூரியமின் சக்தி என்றால் என்ன? மிதக்கும் சூரியமின் அமைப்புகள் என்பவை நீர்த்தேக்கங்கள் மற்றும் ஏரிகள் போன்ற நீர்நிலைகளின் மேல் மிதக்கும் தளங்களில் பொருத்தப்பட்ட சூரியமின் தொகுதிகளைக் (Solar Modules) கொண்டிருக்கின்றன. அவற்றின் நிலையைத் தக்க வைத்துக் கொள்ள, அந்த தளங்கள் நீர்த்தேக்கத்தின் அடிப்பகுதியிலோ அல்லது கரைகளிலோ நங்கூரமிடப்படுகின்றன. கணினியின் வடிவமைப்பைப் பொறுத்து இன்வெர்ட்டர்கள் மற்றும் பிற மின் சாதனங்கள் மிதக்கும் தளங்களிலோ அல்லது கரையிலோ நிறுவப்படலாம். மிதக்கும் சூரியமின் அமைப்புகளால் உருவாக்கப்படும் தூய்மையான மின்சாரம் மின் கேபிள்கள் மூலம் கரைக்கு கடத்தப்படுகிறது. இந்த அமைப்புகளை நிறுவ நிலம் தேவையில்லை என்பதால், தொழில்துறை குளங்கள், நீர்த்தேக்கங்கள் மற்றும் உள்நாட்டு நீர்நிலைகள் மிதக்கும் சூரியமின் திட்டங்களை அமைப்பதற்கு மிகவும் ஏற்றவையாகும். இந்தியாவிற்கான முக்கியத்துவம் இந்தியாவில் மிதக்கும் சூரியமின் சக்தி வழங்கும் மிகப்பெரிய ந நன்மை நிலப் பாதுகாப்பாகும். இது நிலத்தை மிகவும் திறம்பட பயன்படுத்த உதவுவதோடு பொருளாதார நன்மைகளையும் வழங்குகிறது. நீர் ஆவியாவதைக் குறைத்தல் மற்றும் சூரியமின் தொகுதிகளின் செயல்திறனை மேம்படுத்துதல் ஆகியவை இதர நன்மைகளாகும். மிதக்கும் சூரியமின் அமைப்புகளால் மூடப்பட்ட நீர்நிலைகளின் பகுதிகள், மூடப்படாத பகுதிகளை விட குறைவான ஆவியாதல் விகிதத்தைக் கொண்டுள்ளன. இருப்பினும், நீர் ஆவியாதல் குறைப்பினால் கிடைக்கும் நீர் சேமிப்பானது, மூடப்பட்ட பரப்பளவு, உள்ளூர் காலநிலை நிலைமைகள் மற்றும் நீர்த்தேக்கத்தின் பண்புகளைப் பொறுத்தது. மேலும், சூரியமின் தொகுதிகளின் கீழ் உள்ள நீர் அவற்றை குளிர்ச்சியாக வைத்திருக்கிறது, இதன் மூலம் குறிப்பாக வெப்பமான கோடை காலங்களில் அவற்றின் செயல்பாடு மற்றும் திறனை அதிகரிக்கிறது. மிதக்கும் சூரிய மின்சாரத்தை அமைப்பதில் இந்தியா ஏற்கனவே குறிப்பிடத்தக்க முன்னேற்றத்தை அடைந்துள்ளது. என்.டி.பி.சி (NTPC) நிறுவனம் 2022-இல் இந்தியாவின் மிகப்பெரிய மிதக்கும் சூரியமின் திட்டங்களான தெலங்கானாவில் 100 மெகாவாட் இராமகுண்டம் திட்டத்தையும், கேரளாவில் 92 மெகாவாட் காயங்குளம் திட்டத்தையும் தொடங்கியது. மத்தியப் பிரதேசத்தில் திட்டமிடப்பட்டுள்ள 600 மெகாவாட் ஓம்காரேஷ்வர் மிதக்கும் சூரியமின் பூங்கா மற்றொரு முக்கிய திட்டமாகும், இதில் 278 மெகாவாட் திறன் தற்போது செயல்பாட்டில் உள்ளது. இந்த பூங்கா முழுமையாகச் செயல்படும் போது, அதன் 25 ஆண்டு கால ஆயுட்காலத்தில் 460 கோடி யூனிட் தூய்மையான மின்சாரத்தை உற்பத்தி செய்யும் என்று எதிர்பார்க்கப்படுகிறது. இருப்பினும், இந்தியாவில் மிதக்கும் சூரியமின் உற்பத்தியின் தற்போதைய நிறுவப்பட்ட திறன் 700 மெகாவாட்டாக மட்டுமே உள்ளது. தேசிய சூரிய ஆற்றல் நிறுவனம் நடத்திய சமீபத்திய மதிப்பீடு, நாட்டின் மிதக்கும் சூரியமின் சாத்தியக்கூறு 102 ஜிகாவாட்டாக உள்ளது எனச் சுட்டிக்காட்டுகிறது (நீர்த்தேக்கப் பகுதிகளில் 20% பயன்பாட்டை மட்டுமே கணக்கில் எடுத்துக்கொண்டால்). இது மிகப்பெரிய விரிவாக்க வாய்ப்பைக் காட்டுகிறது. PM-SSY திட்டத்தின் பங்கு இந்தியாவின் தற்போதைய மிதக்கும் சூரியமின் அமைப்புகள், மாநில முகமைகள் மற்றும் பொதுத்துறை நிறுவனங்களால் உருவாக்கப்பட்ட சில பெரிய திட்டங்களை மட்டுமே கொண்டுள்ளன. இந்த திட்டங்களைத் தாண்டி, இந்த சூரியமின் பிரிவு நாட்டில் இன்னும் பெரிய அளவில் வேகமெடுக்கவில்லை. பிரதான் மந்திரி சூர்ய சரோவர் யோஜனா திட்டம் இதை மாற்றி, இந்தியாவின் புதுப்பிக்கத்தக்க ஆற்றல் சூழலில் மிதக்கும் சூரியமின்சாரத்தை முதன்மைப்படுத்த நோக்கமாகக் கொண்டுள்ளது. இத்திட்டம் தகுதியான ஒவ்வொரு திட்டத்திற்கும் அது தொடங்கப்படும் போது மெகாவாட்டிற்கு ரூ.1 கோடி மத்திய நிதி உதவியை (CFA) வழங்கும். வெற்றிகரமான மிதக்கும் சூரியமின் திட்டங்களுக்கு, ஹைட்ரோகிராஃபிக் மதிப்பீடுகள் (நீர்நிலையின் ஆழம் மற்றும் அடிப்பகுதியின் வரையறைகள் போன்ற இயற்பியல் பண்புகளைப் புரிந்துகொள்வதற்குக் செய்யப்படுபவை) மற்றும் சுற்றுச்சூழல் மதிப்பீடுகள் (நீர்வாழ் உயிரினங்கள் மற்றும் நீரின் தரத்தில் ஏற்படும் சாத்தியமான தாக்கங்களை மதிப்பிடுவதற்கு) உள்ளிட்ட சாத்தியக்கூறு ஆய்வுகள் மற்றும் ஆயத்த நடவடிக்கைகள் மிக முக்கியமானவை. இந்த நடவடிக்கைகள் அதிக நேரத்தையும் வளங்களையும் பெறக்கூடியவை என்றாலும், திட்ட உருவாக்கத்தில் உள்ள அபாயங்களைக் குறைக்க இவை அவசியமானவை. இத்திட்டம் இதை அங்கீகரித்து, இந்த நடவடிக்கைகளுக்காக ஒரு திட்டத்திற்கு ரூ.0.5 கோடி வரை கூடுதல் மத்திய நிதி உதவியை வழங்குகிறது. இது உள்நாட்டு உற்பத்தியை ஊக்குவிப்பதுடன், மிதக்கும் சூரியமின் மதிப்புச் சங்கிலி முழுவதும் வேலை வாய்ப்புகளையும் உருவாக்கும். இத்திட்டம் 5 ஆண்டு செயல்படுத்தும் காலத்தைக் கொண்டுள்ளது மற்றும் இதற்கான நிதி உதவி 2032-33 வரை கிடைக்கும். வெற்றிக்குத் தேவையான காரணிகள் இத்திட்டத்தின் வெற்றியானது நிதி உதவியை மட்டும் சார்ந்திருக்காமல், திறம்பட செயல்படுத்துதல், தகுதியான திட்டங்களின் நிதித் தகுதி (bankability) மற்றும் நிறுவனங்களுக்கிடையேயான ஒருங்கிணைப்பு ஆகியவற்றையும் சார்ந்துள்ளது. திட்டத்தை செயல்படுத்துவதற்கு ஏற்ற நீர்நிலைகளைத் தெளிவாகக் கண்டறிவதும், ஒவ்வொரு இடத்திற்கும் விரிவான சாத்தியக்கூறு ஆய்வுகளை மேற்கொள்வதும் தேவைப்படுகிறது. மிதக்கும் சூரியமின் அமைப்புகள் தீவிரமான காற்றுகள், அலைகள் மற்றும் அதிவேகமாக மாறும் நீர் மட்டங்களுக்கு ஆளாகின்றன, இதனால் காலநிலையைத் தாங்கக்கூடிய கணினி வடிவமைப்பு மிகவும் முக்கியமானது. அதேபோல், சூழலியல் மற்றும் நீர்வாழ் உயிரினங்கள் மீது எந்தவொரு மோசமான பாதிப்புகளும் ஏற்படாமல் தவிர்ப்பதும் முக்கியம். எனவே, சூழலியல் உணர்திறன் கொண்ட நீர்நிலைகள், அத்துடன் பல்லுயிர்ப் பெருக்கம், பறவைகளின் வாழிடங்கள் மற்றும் மீன்பிடித் தொழிலுக்கு முக்கியமான பகுதிகள் கவனமாக கையாளப்பட வேண்டும் மற்றும் முழுமையான மதிப்பீடுகளுக்குப் பிறகே மிதக்கும் சூரியமின் வளர்ச்சிக்கு அங்கீகரிக்கப்பட வேண்டும். மிதக்கும் தளங்கள், நங்கூரமிடும் அமைப்புகள், சிறப்பு மின் சாதனங்கள் மற்றும் நிறுவல் செலவு காரணமாக, பாரம்பரிய தரைமட்ட சூரியமின்சாரத்தை விட மிதக்கும் சூரியமின் சக்தி பொதுவாக விலை உயர்ந்ததாகும். ஆற்றல் சேமிப்பு அமைப்புகளைச் சேர்ப்பது ஒட்டுமொத்த மூலதனச் செலவை மேலும் அதிகரிக்கும். திட்டத்தின் கீழ் வழங்கப்படும் மத்திய நிதி உதவி திட்டத்தின் பொருளாதார நிலையை மேம்படுத்தும் என்றாலும், உருவாக்குநர்களுக்கு மலிவான நிதியுதவியும், நீண்டகால மின் கொள்முதல் ஒப்பந்தங்கள் மூலம் தெளிவான வருவாய் வழிகளும் தேவைப்படும். மிதக்கும் சூரியமின் அமைப்புக்கு அனுமதி பெற, மாநில முகமைகள், நகராட்சி அதிகார அமைப்புகள், மின்சாரப் பயன்பாட்டு நிறுவனங்கள், நீர்வளம் மற்றும் பாசனத் துறைகள், சுற்றுச்சூழல் அதிகார அமைப்புகள் மற்றும் தொழில்துறைகள் உள்ளிட்ட பல நிறுவனங்களின் ஒருங்கிணைப்பு அவசியமாகும். எனவே, பொருத்தமான நீர்நிலைகளைக் கண்டறிந்து ஒதுக்குவதற்கும், நிறுவனப் பொறுப்புகளை வரைமுறைப்படுத்துவதற்கும், அனுமதிகளை விரைவுபடுத்துவதற்கும் தெளிவான கட்டமைப்புகளை உருவாக்குவது வெற்றிக்கு மிக முக்கியமானதாகும். முன்னால் உள்ள பாதை அரிதான நில வளங்கள் மீது கூடுதல் அழுத்தத்தைக் கொடுக்காமல், இந்தியாவின் புதுப்பிக்கத்தக்கத் திறனை விரிவாக்குவதற்கான கூடுதல் பாதையை வழங்குவதன் மூலம், தரைமட்ட மற்றும் கூரைமேல் சூரியமின் அமைப்புகளுக்கு மிதக்கும் சூரியமின் சக்தி ஒரு துணையாக இருக்கும். பிரதான் மந்திரி சூர்ய சரோவர் யோஜனா திட்டம், மிதக்கும் சூரியமின்சாரத்தை ஒருசில பெரிய அளவிலான நிறுவல்களில் இருந்து முறையான மற்றும் பரவலான பயன்பாட்டை நோக்கி நகர்த்துவதற்கான வாய்ப்பை வழங்குகிறது. ஆனால், நிதி உதவியை உண்மையான திட்டங்களாக மாற்றுவதற்கு கவனமான இடத்தை தேர்வு செய்தல், சுற்றுசூழலுக்கு உகந்த மற்றும் காலநிலையைத் தாங்கும் வடிவமைப்புகள் மற்றும் பயனுள்ள நிறுவன ஒருங்கிணைப்பு ஆகியவை தேவைப்படும். மெகாவாட் அளவில் மிதக்கும் சூரியமின்சாரத்தின் தொழில்நுட்ப சாத்தியக்கூறை இந்தியா ஏற்கனவே நிரூபித்துள்ளது. பிரதான் மந்திரி சூர்ய சரோவர் யோஜனா திட்டம் இப்போது இந்த அனுபவத்தை கட்டியெழுப்பவும், நீர் வளங்களைச் சிறப்பாகப் பயன்படுத்தும் அதே வேளையில் நிலத்தின் மீதான அழுத்தத்தைத் தணித்து, இந்தியாவின் புதுப்பிக்கத்தக்க ஆற்றல் கட்டமைப்பில் மிதக்கும் சூரியமின்சாரத்தை ஒரு குறிப்பிடத்தக்க பகுதியாக மாற்றுவதற்கும் ஒரு வாய்ப்பை வழங்குகிறது.