சென்னை பைபாஸ் சாலையில் மெகா மாற்றம்: போக்குவரத்து நெரிசலுக்கு முற்றுப்புள்ளி வைக்க தேசிய நெடுஞ்சாலைகள் ஆணையம் திட்டம்

தேசிய நெடுஞ்சாலைகள் ஆணையம் (NHAI) சென்னை பைபாஸ் சாலையில் போக்குவரத்து நெரிசலைக் குறைக்கவும், இணைப்பு வசதிகளை மேம்படுத்தவும் புதிய நுழைவு மற்றும் வெளியேறும் வழிகளுடன் தடையற்ற சுங்கச்சாவடி அமைப்பை (Barrier-free tolling) அறிமுகப்படுத்த நடவடிக்கை எடுத்து வருகிறது. இதன் மூலம் திருநீர்மலை மற்றும் கல்லிக்குப்பம் ஆகிய இடங்களில் புதிய அணுகல் புள்ளிகள் உருவாக்கப்பட உள்ளன. திருநீர்மலையில் அமைக்கப்படவுள்ள புதிய நுழைவு மற்றும் வெளியேறும் வழிகளுக்கான பணி ஆணையை தேசிய நெடுஞ்சாலைகள் ஆணையம் ஏற்கனவே வழங்கியுள்ளது. இது சென்னை விமான நிலையம், மெட்ராஸ் ஏற்றுமதி செயலாக்க மண்டலம் (MEPZ) மற்றும் நகரின் தென் பகுதிகளுக்குச் செல்லும் வாகன ஓட்டிகளுக்கு பெரும் பயனுள்ளதாக அமையும். அதேபோல, அம்பத்தூரில் இருந்து சென்னை-திருவள்ளூர் இரயில் பாதைக்கு வடக்கே உள்ள பகுதிகளுக்கு எளிதாகச் செல்ல கல்லிக்குப்பம் பகுதியில் மற்றொரு அணுகல் புள்ளி திட்டமிடப்பட்டுள்ளது. கல்லிக்குப்பம் அருகே இரயில் பாதை குறுக்கிடுவதால் சேவை சாலை பாதியிலேயே முடிவடைவதாகவும், இதனால் நீண்ட தூரம் சுற்றிச் செல்ல வேண்டியிருப்பதாகவும் அம்பத்தூர்-புழல் சாலை வாசிகள் தொடர்ந்து தெரிவித்து வந்த கோரிக்கைக்கு தீர்வாக இது அமையவுள்ளது. இத்திட்டத்தின் மற்றொரு முக்கிய அம்சமாக சென்னை பைபாஸ் சாலையில் செயல்பட்டு வரும் சுங்கச்சாவடிகளில் பெரிய மாற்றங்கள் செய்யப்பட உள்ளன. அதன்படி, தற்போதுள்ள வானகரம் சுங்கச்சாவடி திருநீர்மலைக்கு மாற்றப்படும். சூரப்பட்டு சுங்கச்சாவடிக்கு பதிலாக அத்திப்பட்டு (டீகாத்லான் அருகே) மற்றும் மேனாம்பேடு ஆகிய இடங்களில் பரவலான சுங்கக் கட்டண வசூல் அமைப்பு ஏற்படுத்தப்படும். இந்த புதிய சுங்கச்சாவடிகள் அனைத்தும் 'மல்டி லேன் ஃப்ரீ ஃபுளோ' (MLFF) என்ற நவீனத் தொழில்நுட்பத்தின் மூலம் இயங்கும். இதனால் வாகனங்கள் சுங்கச்சாவடிகளில் நிற்காமல் தடையின்றி செல்ல முடியும். இந்த முறையில் ஃபாஸ்டேக் (FASTag) மற்றும் தானியங்கி எண் பலகை கண்டறியும் கேமராக்கள் (ANPR) மூலம் வாகனங்கள் வேகமாக அடையாளம் காணப்பட்டு சுங்கக் கட்டணம் மின்னணு முறையில் பிடிக்கப்படும். ஃபாஸ்டேக் இயங்காத அல்லது ஸ்கேன் செய்ய முடியாத வாகனங்களுக்கு கேமரா பதிவுகள் மூலம் மின்-நோட்டீஸ் அனுப்பப்படும். 2025-26ஆம் ஆண்டின் மதிப்பீட்டின்படி, திருநீர்மலை புள்ளியில் ரூ.111.49 கோடியும், அத்திப்பட்டு-மேனாம்பேடு புள்ளியில் ரூ.90.35 கோடியும் வருடாந்திர சுங்கக் கட்டணமாக வசூலாகும் என எதிர்பார்க்கப்படுகிறது. இதுதவிர, சாலைப் பாதுகாப்பு மற்றும் உள்ளூர் போக்குவரத்தை மேம்படுத்த வானகரம் சந்திப்பில் ஆறு வழி வாகன சுரங்கப்பாதை மற்றும் கூவம் ஆற்றின் குறுக்கே புதிய தரைப்பாலம் ஆகிய கட்டமைப்பு பணிகளும் மேற்கொள்ளப்பட உள்ளன. நாடு முழுவதும் 16 சுங்கச்சாவடிகளில் இந்த தடையற்ற சுங்கக் கட்டண முறையை தேசிய நெடுஞ்சாலைகள் ஆணையம் நடைமுறைப்படுத்தி வருகிறது. இதில் தமிழகத்தில் ஏற்கனவே நெமிலி, சின்னசமுத்திரம் மற்றும் பரனூர் ஆகிய இடங்களில் சோதனை ஓட்டங்கள் நிறைவடைந்து விரைவில் பயன்பாட்டுக்கு வரவுள்ள நிலையில், சென்னை பைபாஸ் சாலையிலும் இத்தொழில்நுட்பம் விரைவில் செயல்படுத்தப்படவுள்ளது.