நெரிசலுக்கு முற்றுப்புள்ளி: பேசின் பாலம், வியாசர்பாடி மேம்பாலம் விரிவாக்கத்திற்கு நிதி ஒதுக்கீடு

வட சென்னை பகுதியில் நெடுநாட்களாக நீடித்து வரும் கடுமையான போக்குவரத்து நெரிசலுக்குத் தீர்வு காணும் வகையில், பேசின் பாலம் மற்றும் எருக்கஞ்சேரி நெடுஞ்சாலையில் அமைந்துள்ள வியாசர்பாடி மேம்பாலம் (ROB) ஆகிய இரு முக்கிய பாலங்களை விரிவாக்கம் செய்ய மாநில நெடுஞ்சாலைத் துறை முடிவு செய்துள்ளது. சட்டப்பேரவை கூட்டத்தொடரில் இதற்கான அதிகாரப்பூர்வ அறிவிப்பை பொதுப்பணி மற்றும் நெடுஞ்சாலைத் துறை அமைச்சர் ஆதவ் அர்ஜுனா வெளியிட்டார். இந்த இரு பாலங்களின் விரிவான திட்ட அறிக்கை (DPR) தயாரிப்பதற்காக, முதற்கட்டமாக தலா ரூ.20 லட்சம் நிதி ஒதுக்கீடு செய்யப்பட்டுள்ளது. வியாசர்பாடி மேம்பாலத்தின் தற்போதைய நிலையும் விரிவாக்கத் திட்டமும் கடந்த 2010-ஆம் ஆண்டு ரூ.88.65 கோடி மதிப்பீட்டில் தொடங்கப்பட்ட 1,720 மீட்டர் நீளமுடைய 'Y' வடிவ வியாசர்பாடி மேம்பாலம், நிலம் கையகப்படுத்துவதில் ஏற்பட்ட தாமதங்களால் 2017-ஆம் ஆண்டிலேயே முழுமையாகத் திறக்கப்பட்டது. நான்கு வழிப்பாதையாகத் தொடங்கும் இந்த பாலம், எருக்கஞ்சேரி நெடுஞ்சாலை மற்றும் கல்யாணபுரம் அருகே உள்ள சத்தியமூர்த்தி நகர் முதன்மைச் சாலை என இரு பிரிவுகளாகப் பிரிகிறது. இருப்பினும், மூலக்கடையில் இருந்து வரும் வாகனங்கள் வியாசர்பாடி சந்தை அருகே கடும் நெரிசலில் சிக்குகின்றன. இதேபோல், பேசின் பாலத்தில் இருந்து வரும் வாகனங்களும் தடையின்றி எருக்கஞ்சேரி நெடுஞ்சாலையை அடைய முடியாத சூழல் உள்ளது. இதனால், போக்குவரத்து நெரிசலைக் குறைக்கவும், மாதவரம், புழல் மற்றும் வடசென்னை புறநகர்ப் பகுதிகளுக்கான இணைப்பை மேம்படுத்தவும் இந்த பாலத்தை மேலும் நீட்டிப்பதற்கான சாத்தியக்கூறுகள் குறித்து ஆய்வுகள் மேற்கொள்ளப்படவுள்ளன. பேசின் பாலம் அகலப்படுத்தும் திட்டம் வடசென்னையிலிருந்து சென்ட்ரல் மற்றும் பிராட்வே பகுதிக்குச் செல்லும் வாகனங்களுக்கு பேசின் பாலம் ஒரு முக்கியப் போக்குவரத்து முடக்கமாக இருந்து வருகிறது. இச்சாலை சந்திப்பில் அமைந்துள்ள இரயில்வே பாலம், கூவம் ஆற்றின் குறுக்கே உள்ள பாலம் மற்றும் ஓட்டேரி நுல்லா பாலம் ஆகியவை குறுகலாக இருப்பதால், சாலையின் வாகனங்களைத் தாங்கும் திறன் வெகுவாகக் குறைந்துள்ளது. நெரிசலைக் கட்டுப்படுத்த தற்போது பல இடங்களில் 'யு-டர்ன்' (U-turn) அமைத்து போக்குவரத்து மாற்றங்கள் செய்யப்பட்டுள்ளன. இதனால் வாகன ஓட்டிகள் கூடுதல் தூரம் பயணிக்க வேண்டிய கட்டாயத்திற்குத் தள்ளப்பட்டுள்ளனர். இப்பிரச்சினைக்கு நிரந்தரத் தீர்வாக, கொருக்குப்பேட்டை, வியாசர்பாடி மற்றும் மத்திய சென்னையை இணைக்கும் பேசின் பாலத்தின் குறுகியப் பகுதிகளை அகலப்படுத்த ஆய்வுகள் நடத்தப்பட்டு விரிவான திட்ட அறிக்கை தயார் செய்யப்படவுள்ளது. இத்திட்டங்கள் செயல்பாட்டிற்கு வரும்போது, வடசென்னை மக்களின் பல ஆண்டுகாலப் போக்குவரத்துப் இன்னல்களுக்கு பெரிய அளவில் விடிவு காலம் பிறக்கும் என எதிர்பார்க்கப்படுகிறது.