இனி போர்டிங் பாஸில் சீல் இல்லை: சர்வதேச விமான பயணிகளுக்கு மத்திய அரசு வழங்கிய புதிய அறிவிப்பு
இந்திய சர்வதேச விமான நிலையங்களில் பயணம் செய்யும் பயணிகளின் வசதியை மேம்படுத்தும் வகையில், மத்திய உள்துறை அமைச்சகத்தின் கீழ் இயங்கும் குடியேற்றத் துறை ஒரு முக்கிய நடைமுறை மாற்றத்தைக் கொண்டு வந்துள்ளது. அதன்படி, வெளிநாடுகளுக்குச் செல்லும் பயணிகளின் போர்டிங் பாஸில் குடியேற்ற அதிகாரிகள் இனி முத்திரையிட மாட்டார்கள். இப்புதிய மாற்றம் செப்டம்பர் 1 முதல் அமலுக்கு வருகிறது. முன்னதாக, சர்வதேசப் பயணங்களின் போது பயணிகளின் ஆவணங்களைச் சரிபார்த்த பிறகு அவர்களின் போர்டிங் பாஸில் முத்திரை பதிப்பது வழக்கமாக இருந்தது. இருப்பினும், இவ்வாறு முத்திரையிடும் போது அதில் உள்ள விமான பயண விவரங்கள் மறைக்கப்பட்டு, வாசிப்பதில் சிரமம் ஏற்படுவதாகவும், அது பயணிகளுக்குத் தேவையற்ற அசௌகரியத்தை உருவாக்குவதாகவும் தொடர் புகார்கள் எழுந்தன. இதனிடையே, விமான நிலைய நுழைவு வாயில்களில் பாதுகாப்பில் ஈடுபடும் மத்திய தொழில் பாதுகாப்புப் படையினர் (CISF) ஏற்கனவே போர்டிங் பாஸ்களைச் சரிபார்த்துவிட்டு அதில் எந்த முத்திரையும் பதிப்பதில்லை என்ற நடைமுறையே பின்பற்றி வருகின்றனர். அதே எளிமையான முறையைத் தற்போது குடியேற்றப் பிரிவிலும் செயல்படுத்துமாறு அதிகாரிகளுக்கு அறிவுறுத்தப்பட்டுள்ளது. இதன் மூலம் காகித போர்டிங் பாஸ் வைத்திருக்கும் பயணிகளுக்கும் இனி முத்திரையிடும் நடைமுறை இருக்காது. மேலும், இந்திய பாஸ்போர்ட் வைத்திருக்கும் பயணிகள் நாட்டிற்குள் வரும்போதும் அல்லது வெளிநாடுகளுக்குச் செல்லும்போதும் அவர்களின் பாஸ்போர்ட்டில் முத்திரையிடும் வழக்கத்தையும் முற்றிலுமாக நிறுத்துவதற்கான சோதனைக் கட்டப் பணிகள் தற்போது நடந்து வருகின்றன. இந்த முயற்சி வெற்றிபெறும் பட்சத்தில், நாடு முழுவதும் உள்ள அனைத்து சர்வதேச விமான நிலையங்களிலும் இப்புதிய டிஜிட்டல் முறையிலான சரிபார்ப்பு விரைவிலேயே முழுமையாக நடைமுறைக்கு வரும் என எதிர்பார்க்கப்படுகிறது.
சர்வதேச விமான நிலையங்களில் பயணிகளின் வசதியைக் கருத்தில் கொண்டு, மத்திய உள்துறை அமைச்சகத்தின் குடியேற்றத் துறை புதிய மாற்றத்தை அமல்படுத்தியுள்ளது. இனி வெளிநாடுகளுக்குப் பயணம் செய்யும் பயணிகளின் போர்டிங் பாஸில் குடியேற்ற அதிகாரிகள் முத்திரையிட மாட்டார்கள்.
இந்த புதிய நடைமுறை செப்டம்பர் 1-ம் தேதி முதல் நடைமுறைக்கு வருகிறது. முன்னதாக, சர்வதேசப் பயணங்களின்போது ஆவணங்களைச் சரிபார்த்த பிறகு போர்டிங் பாஸில் முத்திரை பதிக்கும் முறை பின்பற்றப்பட்டு வந்தது, தற்போது அது ரத்து செய்யப்பட்டுள்ளது.